بكري: يا شيخ محمد الحسن: قلت في جمعة من الجمع كنت بتكلم الناس عن حكم المرتد. هل كان كلامك دا في سياق كلامك عن الأستاذ محمود؟
الشاهد: ما قصدته وإنما كان ضمناً.
بكري: هل، قبل الخطبة دي، ما تحدثت عن افكار الأستاذ محمود؟
الشاهد: أنا ما عارف قبلها ولاَّ بعدها.. لكن تحدثت.
بكري: هل إنت قمت بأي مجهود في الاطلاع على كتب الأستاذ محمود قبل أن تتحدث في الجامع.
الشاهد: أيوه.. قريت كتبه، وقريت حكم المرتد في كتب السنة.
بكري: هل وصلتك دعوة خاصة من الجمهوريين، وانت واحد من العلماء. لتحضر للأستاذ وتتبين أمر الحق؟
الشاهد: نعم وصلت..
بكري: ماذا كان ردك على هذه الدعوة؟
الشاهد: اعتذرت عن الدعوة.. لأن المكان ما محايد، وقد يحدث شغب أو تهجم.
بكري: هل تذكر المكان الذي دعوك فيه؟
الشاهد: المكان كان منزل خيري.
بكري: وهل ده مكان للشغب؟
الشاهد: نعم – ما بتذكر إنت مرة جيتني في البيت، وأنا اشتريت منك كتاب – فجاء واحد من المصلين ومزق الكتاب، والأخ الكان معاك قال ليك ترجع ليهو القروش، وإنت رفضت ترجع القروش، وأنا تدخلت وحميتك من المصلين.
بكري: هل تذكر أنو جماعة الأستاذ محمود عندهم مسلك مثل هذا المسلك المشين الذي حدث من الناس البتكلمهم كل يوم وبتربيهم؟
الشاهد: الناس الما عندهم حق ما بكون عندهم موقف زي ده.
بكري: هل تذكر موقف معين من الجمهوريين أحدثوا فيه شغباً مثل هذا الشغب؟
الشاهد: لا أذكر.
بكري: من هو المسلم الملتزم؟
الشاهد: المؤمن بالله واللي بيصلي ويزكي وبحج وبصوم وبجاهد.
بكري: هل زمن الانجليز كان البلد محكوم بشريعة الله؟
الشاهد: ما كانوا محكومين إلا في الأحوال الشخصية.
بكري: هل عُرف عن القضاة الشرعيين مسلكاً يدل على أنهم كانوا يجاهدوا في سبيل الله؟
الشاهد: كل أفراد الشعب كانوا بجاهدوا في سبيل الله.
بكري: هل الجهاد في سبيل الله يقتضي تحكيم كتاب الله؟
الشاهد: يقتضي الإيمان؟
بكري: هل الجهاد في سبيل الله ما بقتضي إمام ونظام وجماعة وجيش؟
الشاهد: إذا كان في نظام دا المطلوب وإلا إذا ما في يرفع السلاح.
بكري: هل حصل أنو القضاة الشرعيين حملوا السلاح في وجه الانجليز؟
الشاهد: الجهاد إذا قام به البعض. سقط عن الباقين.
بكري: هل هم مطالبين برفع السلاح؟
الشاهد: نعم. واذا كان في مفاوضات كمان يفاوضوا.
بكري: هل ما بتعتقد أن القضاة الشرعيين قياديين للناس؟
الشاهد: المسلم طبعاً بحب أخيه وإذا كان رجل دين.. يقدره أكثر.
بكري: هل علمت أن القضاة الشرعيين حملوا السلاح في وجه الاستعمار أو حتى جربوا المفاوضات؟
الشاهد: أنا ما مذكر القضاة الشرعيين لكن عارف إنو الناس كلهم جاهدوا.
بكري: هل تذكر أنو في ناس وطنيين؟
الشاهد: أذكر على عبد اللطيف وغيرو.
بكري: ديل سنة 24.. وبعد كده؟
الشاهد: أزهري وغيرو.
بكري: إنت ذكرت ديل وليه ما ذكرت القضاة الشرعيين؟
الشاهد: لأنهم لا دخل لهم في السياسة وقالوا ليهم أمسكوا القضاء الشرعي فقط.
بكري: هل تعلم أنو في ذلك الوقت بعض الموظفين كان يشملهم هذا الأمر وده ما منعهم من الثورة؟
الشاهد: بعض القضاة ورجال الدين جاهدوا مثل الامام محمد أحمد المهدي.
بكري: هل تعرف موقف القضاة الشرعيين من محمد أحمد المهدي؟
الشاهد: لا أعلم
بكري: ما هو دورك في العمل لعودة الشريعة؟
الشاهد: بخطب كل يوم.
بكري: ما عندك تنظيم معين للعمل لعودة الشريعة؟
الشاهد: ما عندي تنظيم معين. إنت دايرني أكتب كتب وأحوم بيها على الناس؟
بكري: آيه المانع انك تكتب كتب؟
الشاهد: والله ماعندي المؤهلات الكافية ولا العلم الكافي.
بكري: إذا كان في زول بيعمل وسط جماعة بعلم وإنت قلت إنك قليل العلم فما الذي يمنعك أن تنضم للجماعة دي لتتعلم؟
الشاهد: مؤهلاتي وعدم وقتي.
بكري: هل ما عندك الوقت للعلم وعندك وقت لتكفير الناس؟
الشاهد: أنا ما بكفر.. الشريعة هي البتكفر الناس. تقول الزول إذا عمل كده يكون كافر.
بكري: هل حكم الشريعة قايم الآن؟
الشاهد: لا.. غير قائم.
بكري: ((ومن لم يحكم بما أنزل الله فاولئك هم الكافرون))
إنت قررت أنو الشريعة ما في.. فهل دا ما واجبك أن تكلم الحاكم بأن يحكم بالشريعة؟
الشاهد: أنا وجهت دروس للمسلمين أن يحكموا فيهم كتاب الله وكان بيحضر دروسي دي ويصلي معاي المحافظ وكبار المسئولين.