أحمد مصطفى دالي يناقش الشاهد
دالي: يا سيد جعفر إنت سكرتير ثقافي لنادي الخريجين ما هو تعريفك للثقافة؟
الشاهد: الكلمة دي واسعة لا تحدد.
دالي: ما بتعرف معنى محدد للثقافة؟
الشاهد: المعنى أوسع من أن يحدد في جلسة محكمة.
دالي: إذا قلت الثقافة هي التقويم – تقويم النفس هل توافق.
الشاهد: تعريف غريب وتعريف قاصر للغاية. لأنو الثقافة حاجات كثيرة. المجتمع كلو داخل في الثقافة.
دالي: في حديث يقول: "الناس معادن كمعادن الذهب والفضة خيارهم في الجاهلية خيارهم في الاسلام إذا ثُقفوا" رأيك شنو؟
الشاهد: ما عارف.
دالي: في بيت شعر يقول:
إنا إذا عض الثقاف برأس صعدتنا لوينا
نحمي حقيقتنا وبعض الناس يسقط بين بين
الشاهد: ده سؤال في الأدب والنصوص
دالي: إنت برهاني. هل عندك أوراد وهي شنو؟
الشاهد: أمتنع عن الاجابة
القاضي: الامتناع ليس إجابة لابد أن تجاوب.
الشاهد: أوراد كثيرة.. لا إله إلا الله. بسم الله حاجات كتيرة.
دالي: كم مرة في اليوم؟
الشاهد: كتير.
دالي: هل الاصحاب كانوا مقيمين للشريعة؟
الشاهد: نعم.
دالي: هل قريت في السيرة أنو الصحابة كان بعملوا أوراد؟
الشاهد: أوراد زي شنو؟
دالي: زي أورادكم.
الشاهد: أورادنا دي ما كانوا بعملوها.
دالي: سُئلت عن السبب البيهو قاضي القضاة كتب للسلطات السياسية لتوقف محاضرة للأستاذ محمود هل عندك علم بيها؟
الشاهد: لا أذكر.
دالي: نحن الجمهوريين عندنا رأي في أنو القضاة الشرعيين ما عندهم فهم للدين، وجاهلين بحقائق العصر. هل تفتكر عندهم فرصة في مواجهتنا بالحجة؟
الشاهد: ما عارف.
دالي: هل بتعرف الخواض الشيخ؟
الشاهد: أيوة.. تلميذي درستو.
دالي: هل بتفتكر أنو ممكن يرد على الجمهوريين ويجادلهم؟
الشاهد: اعتقد عندو المقدرة
دالي: إذا كان بتعتقد انو عندو المقدرة ووريناك إتصل بالسلطة السياسية لإيقاف نشاط الجمهوريين – تبريرك يكون شنو؟
الشاهد: أنا جاوبت على سؤال في المعنى ده. في مسألة قاضي القضاة لأنو ليهو الحق.
دالي: نحنا عندنا ليك برقية من الخواض الشيخ يقول فيها للسلطة الحاضرة "حماية ديننا أمانة في اعناقكم" بدل يناقش الجمهوريين. هل ده كلام صحيح؟
الشاهد: كلام صحيح – عشان السلطة تعمل عملها في ايقاف الفتنة.
دالي: هل بتعرف اتجاه الخواض الشيخ؟
القاضي: ((يعترض على السؤال))
دالي: بتعرف انو هو إمام جامع المدرسة الثانوية؟
الشاهد: بعرف أنو بيؤم الناس لكن مش إمام رسمي.
دالي: هل بتعرف أنو في محكمة الردة إشترك واحد إسمو عطية محمد سعيد من جماعة جبهة الميثاق الإسلامي سابقاً؟
الشاهد: إشترك شنو يعني – كان القاضي؟ المتهم – ولا شنو؟
دالي: كان شاهد.
الشاهد: نعم.
دالي: إنت قلت أنو قاضي القضاة أمر بإيقاف محاضرة الأستاذ بمعهد المعلمين لإيقاف البلبلة والفتنة. هل بتعرف حوادث الجامعة الأخيرة؟
الشاهد: ما بعرف
دالي: إنت بتعرف شنو؟
الشاهد: بعرف جغرافيا
دالي: بتعرف شنو عن ال "" Sea floor spreading؟
الشاهد: بالعربي معناها شنو؟ اتكلم معاي بالعربي.
دالي: ده بس مصطلح كدا.
الشاهد: ما بعرف.
دالي: إنت قلت قاضي القضاة اعترض على محاضرة الأستاذ لمنع البلبلة. وأحداث شعبان كانت بلبلة هل بلغك أنو قاضي القضاة اعترض على بلبلة الطلاب؟
الشاهد: لا اعلم.
دالي: هل إحتمال إثارة البلبلة في المحاضرات ولا المظاهرات؟
الشاهد: كُلُّو
دالي: بنفس الدرجة؟
الشاهد: محاضرة عن إمرؤ القيس ما فيها حاجة – لكن محاضرة في الدين يكون فيها بلبلة واخلال بالأمن.
القاضي: المظاهرة في حد ذاتها اخلال بالأمن. محاضرة ربما يحدث فيها إخلال بالأمن وربما لا يحدث.
الشاهد: المحاضرة ذاتها قد تخرج منها مظاهرة.
دالي: هل تعلم أن المحاضرة اقيمت ولم يحدث فيها أي شئ يخل الأمن؟
الشاهد: لا أعلم.
دالي: عندنا في كتاب الرسالة الثانية من الاسلام أنو الرسالة الثانية هي سنة النبي – هل مر عليك كلام زي دا؟
الشاهد: لم أقرأ
دالي: في كتاب اسمه محمود محمد طه – يدعو إلى طريق محمد وجاء فيه: ((إننا استيقنا من أنه بتقليد محمد تتوحد الأمة ويتجدد دينها))
الشاهد: لم أقرأ.
دالي: يا سيد جعفر إنت سكرتير ثقافي – وعندك رأي في الفكرة اتضح إنك ما قريت كتاب "طريق محمد" ولا "الرسالة الثانية" ولا "رسالة الصلاة" ومع ذلك بتعارض – ده يفسروه
بشنو؟
الشاهد: ما في مانع أنو أكون اطلعت اطلاع سريع – على الطاير كده – وفي وقتها عرفت رأي الجماعة ديل شنو.
دالي: وهل فهمك في الشريعة أنو تقرأ في موضوع وفي الدين على الطاير وبدون فهم وتحكم عليهو؟
الشاهد: أنا أصلو لما أقرأ وألقى شيء مفارق للشريعة بجدعو بعيد.
دالي: المفارق شنو؟
الشاهد: حاجات كتيرة – رسالة أولى ورسالة ثانية والزول يصل درجة معينة يترك العبادة والصلاة
دالي: هل ربنا محتاج لصلاتك؟
الشاهد: السؤال دا ذاتو كفر – الله محتاج كيف؟
دالي: طيب ليه أمرنا بالصلاة؟
الشاهد: ما بعرف.. لكن قال صلوا نطيع الأمر ونصلي.
دالي: إنت قلت بتسمع للنابلسي وتؤمن بالشريعة النابلسي بقول:
"إن تكن بالله قائم لم تكن بل أنت هو
انت ظل الغيب من أسمائه والشمس هو"
ده وين في الشريعة؟
الشاهد: جايز يكون مستند على الحديث البقول "ما زال عبدي يتقرب إليَّ بالنوافل حتى أحبه، فإذا أحببته صرت بصره الذي يبصر به ويده التي يبطش بها.. إلخ"
دالي: هل الشيخ الدسوقي بقول في أوراده "ده ده ده كدا كوى كدي كدي كدي"؟ هل ده من الشريعة ولاَّ من أوراد النبي؟
الشاهد: ما في أوراد النبي
