الأستاذ محمود محمد طه يناقش الشاهد الأول
الأستاذ: ما حآخد معاك زمن طويل. أنا لاحظت الفرق بين وجهة نظرك ووجهة نظرنا. ولأننا نحن بنعتقد إننا تنظيم بعمل لعودة الدين – نحن أصحاب دعوة سياسية معينة لعودة الدين وإنت قلت مكتفي بطريقة بتعمل أورادها وما بتهتم أن يعود دين لينظم حياة الناس بصورة معينة الكلام ده صحيح؟
الشاهد: ما صحيح
الأستاذ: هل للبرهانية دعوة سياسية معينة لعودة الدين؟
الشاهد: لا
الأستاذ: لو أنا اقترحت عليك اننا مشددين على القضاة الشرعيين لأنو أصلو دا ميدانَّا وإنت ما بتشدد عليهم لأنو ما عندك منهم موقف معين هل توافق على الكلام ده؟
الشاهد: ما بوافق.
الأستاذ: يا سيد جعفر قرئت عليك في جلسة الصباح عبارة "لا تهمهموا بالسبح لا في الخلوات ولا في الطرقات ولا في المكاتب ولا في المركبات العامة فإن قدوة التقليد لم
يكن يهمهم بالسبح وإنما كان يصلي ويفكر ويعمل" وانت قلت بتحتقر الكلام ده – من هو قدوة التقليد؟
الشاهد: يعني شنو؟
الأستاذ: السؤال من هو قدوة التقليد؟
الشاهد: أفتكر تقصد سيدنا محمد.
الأستاذ: هل الكلام ده بحكي حال النبي من انه يصلي ويفكر ويعمل؟
الشاهد: مش النبي براه كل واحد من المسلمين يصلي ويفكر ويعمل؟
الأستاذ: هل كان النبي بهمهم بالسبح ولاَّ يصلي ويفكر ويعمل؟ يعني هل الهمهمة بالسبح سنّة ولا بدعة؟
الشاهد: أنا ما بهمهم أنا بذكر.
الأستاذ: إنت في تعليقك عن الكلام القريناه ليك قلت إنك بتحتقره – هل تعتقد أنو كلمة أحتقر مش إسفاف؟
الشاهد: جايز تكون.
الأستاذ: هل إنت كمتطرق الطريق ما ليهو أثر على أخلاقك. وتهذيبك وعفة لسانك – هل الساير في الطريق ما بستفيد.. أخلاق.. تهذيب.
الشاهد: جايز الواحد يستفيد.. جايز ما يستفيد.
الأستاذ: في الطريق في تسليك معين للمريد.. بتكلموا في الباب ده عن الهمة – تعرف الهمة يعني شنو؟
الشاهد: لا
الأستاذ: بتعرف أنو السالك يحتاج إلى عزيمة لينفذ بيها أوامر الطريق؟
الشاهد: يحتاج.
الأستاذ: هل بتعتقد انو انغماس المريد في "كيف السفة" ما بفت في عزيمتو؟
الشاهد: أنا قلت الشيخ ذاتو "بسف"
الأستاذ: هل تفتكر أنو "الكيف السفة" مش اتجاه خطأ خاصة في التصوف؟
الشاهد: ما أفتكر.
الأستاذ: يا سيد جعفر إنت قلت ما بتسف. هل عندك تصور للإنسان "البسف" إذا فقد "السفة" بضعف ضعف شديد؟
الشاهد: يكون خرمان
الأستاذ: هل الخرمان عندو عزيمة ولاَّ منهار؟
الشاهد: جايز يكون عندو عزيمة كمان قوية.
الأستاذ: إنت رجل في مستوى كبير من الثقافة بوصفك معلم ومتطرق على الطريقة البرهانية – هل بتفتكر أنك انتفعت من الطريقة البرهانية؟
الشاهد: أمتنع عن الإجابة.
الأستاذ: أنا سمعت في كثير من الأسئلة أنك بتقول أمتنع. بقترح عليك أنو الممتنع عن الإجابة أحد رجلين. إما ما عارف الإجابة أو ما عايز يعين المحكمة لتصل للحق؟
القاضي: "يعيد السؤال"
الشاهد: الموضوع ده في أخص خصوصياتي. وأنا حلفت اليمين أن أعين المحكمة.
