عبد الرحيم هلاوي يناقش الشاهد
هلاوي: يا سيد جعفر بتعرف إنو المحاكم الشرعية إسمها اتغير؟
الشاهد: سمعت حاجة بالشكل ده.
هلاوي: سمعت اسمها الجديد؟
الشاهد: أفتكر إنو سموها دوائر الأحوال الشخصية
هلاوي: بتعرف أنو اختصاصها تعدل ولا نفس القديم؟
الشاهد: ما بعرف
هلاوي: لو كان الاختصاص قايم الاسم الأخير منطبق عليها؟
الشاهد: لا أعلم
هلاوي: هل إنت عارف اختصاص المحاكم الشرعية؟
الشاهد: بتنظر في مواضيع الزواج والطلاق وغيرو وبطبق فيها الشريعة.
هلاوي: يعني الأحوال الشخصية؟
الشاهد: ما بعرف أحوال شخصية. يعني إذا كان أنا في المدرسة عندي حاجة شخصية المحكمة الشرعية تدخل فيها؟
هلاوي: لو قلنا ليك شريعة الأحوال الشخصية هي شريعة الأسرة هل الاسم ده بنطبق عليها؟
الشاهد: أمتنع عن الإجابة.
هلاوي: لو قلنا محكمة شرعية بطبق الشريعة كلها. ودوائر أحوال شخصية هي المحكمة البتنظر في مسائل الأسرة هل ده صحيح؟
الشاهد: لا أعلم.
هلاوي: هل المحاكم الشرعية بتحكم بالشريعة كلها؟
((القاضي يعيد السؤال))
هلاوي: كون المحاكم الشرعية تتخصص في جزء من الشريعة هل هي مقهورة ولاَّ لا؟
الشاهد: دي ما مسئوليتهم هم – هم ما عندهم السلطة اللي ينتزعوا بيها مسئوليات أخرى.
هلاوي: يعني هم مغلوبين على؟ ولا أصلهم عايزين كده؟
الشاهد: هم يقوموا بواجبهم في حدود السلطات اللي أدوها ليهم.
هلاوي: يعني دايرين الوضع ده؟
القاضي: يعني لو كنت في مكانهم بتكون مقتنع بوضعك؟
الشاهد: ما بكون مقتنع.
هلاوي: يعني بتكون مغلوب على أمرك.
الشاهد: بعتقد أنو هذا القاضي البحكم بالشريعة في جزء معين ضميرو مستريح عشان نفذ في الجزء اللي أدوه ليهو.
القاضي: هل الشخص ده بيوصف أنو مغلوب على أمرو؟
الشاهد: ما أفتكر.
هلاوي: إنت ما قلت الحاكم ده في أضعف الإيمان؟
الشاهد: السؤال الأنا قلت فيهو كان شنو؟
هلاوي: كان قالوا ليك إذا كان في رجل بقاوم الاستعمار من داخل المساجد وفي نفس الوقت القضاة الشرعيون لا يناهضون الاستعمار بل يمنعون مهاجمته في المساجد وإنت
قلت ده أضعف الإيمان.
الشاهد: السؤال ده ما جاوبت عليهو قبل كدة؟
هلاوي: ده سؤال جديد
الشاهد: أنا أفتكر أنو هو نفسو وجاوبت عليهو. قبل كدة والاجابة مسجلة عند القاضي.
القاضي: هسع الإجابة شنو.
الشاهد: أنو ده أقوى الايمان.
هلاوي: أقوى الايمان يعني أطبق جزء من الشريعة وأترك الباقي؟
الشاهد: أقوى الايمان أن أنفذ الشريعة في مجال اختصاصي
هلاوي: لو واحد مشى للقاضي الشرعي قال ليهو أنا سرقت رايح اعمل ليهو شنو؟
الشاهد: يقول ليهو أمشي المحاكم المدنية.
هلاوي: يعني ما في أقوى الايمان؟
الشاهد: هم ما عندهم ذنب لأنهم سُلبوا الحق في الحكم.
هلاوي: هل البِيُسْلَبْ حقو بكون في أقوى الايمان؟
الشاهد: ده ما حقو الفي جيبو. ده اختصاص إداري.
هلاوي: اتضح ليك إنو نحن ما خرجنا على الاتفاق بيننا وبين النادي..
الشاهد: خرجتو على اعتبار أنكم أسأتوا فئة معينة في الملصقات.
القاضي: الاساءة دي مش من الكتب؟ الملصقات نفسها مش مقتطفات من الكتب؟ زي ما ورد في خطابم ليكم؟
الشاهد: نحن ما كنا عارفين.
القاضي: دا كان واجبكم. السؤال هل خرجوا على الاتفاق؟
الشاهد: نحن وافقنا على عرض الكتاب بس.
القاضي: ((يعيد قراءة طلب إقامة المعرض المقدم للنادي.. الطلب تضمن طلباً بعرض الكتب والملصقات))
((بعد أن سمع الشاهد الطلب المقدم للجنة النادي طالب بقراءة الرد على الطلب فقرأ له))
القاضي: هل وافقتوا على المقتطفات؟
الشاهد: لا الكتب بس
القاضي: إذا إنتو وافقتوا على الكتب المنها المقتطفات آيه يعني المقتطفات؟
هلاوي: هل كتبت الرد علينا إنت؟
الشاهد: اتفقت مع كمال يكتب الرد.
هلاوي: هل كمال اعترض على المقتطفات؟
الشاهد: مقتطفات دي ما كانت في.
هلاوي: لو كان في راجل داير يتكلم في الدين بي بلبلة قاضي القضاة كانوا واجبوا يجئ يرد عليهو ولاَّ يستعدي عليهو السلطات؟
الشاهد: السؤال غير واضح. حاجات كلها مبهمة. قول المسألة واضحة. آيه لو في واحد!؟
هلاوي: قاضي القضاة عالم في الدين. وفي راجل بيعمل بلبلة في الدين – "على حد تعبير الشاهد" – هل الواجب يرد عليهو ولا ينادي السلطات تمنعوا؟
الشاهد: الإثنين. يثبتو من جهة ويمنعو من جهة.
القاضي: ((يعيد السؤال ويطلب من الشاهد أن يكون موضوعياً وواضحاً في إجابته لأن الإلتواء ليس من مصلحة شهادته))
الشاهد: أيوة... يوضح للناس باطل هذا الرجل من هنا ويطلب السلطات تغطس حجرو من هنا.
هلاوي: ورد في قولك كلام عن إسقاط الصلاة وإنت حالف اليمين. هل قرأت عن إسقاط الصلاة في كتب الأستاذ محمود محمد طه؟
الشاهد: لا أذكر.
هلاوي: يا سيد جعفر هل من الدقة أن تقول بأشياء لا تذكرها؟
الشاهد: اتكلمنا مع بكري... وادروب معانا في المدرسة بتكلم عن الكلام ده كثير – رسالة أولى ورسالة تانية الصلاة وما الصلاة وحاجات كثيرة.
القاضي: يعني إنت ما بتجزم بصحة أنو أسقط الصلاة؟
الشاهد: لا أجزم.
هلاوي: هل من حقك أن تقول بكلام ما بتجزم بيهو؟
الشاهد: أنا قلت ما بذكر.
هلاوي: إنت زرت المعرض هل كتبت انطباع في كراس الانطباعات
الشاهد: ما أفتكر.
هلاوي: يعني يحتمل تكون كتبت؟
الشاهد: ما بذكر.
هلاوي: هل مش من واجبك أن تكتب لينا الكلام ده في كراسة الانطباعات عندما استأت من الاساءة؟
الشاهد: لا.. لأنو الواحد بخش معارض كثيرة وما ممكن يكتب في أي معرض.
هلاوي: وضح انك ما أطلعت على الوثائق حتى اللي بتخصكم من مكاتبات بينا وبينكم.. هل ما يحتمل يكون عندنا وثائق تثبت كلامنا عن القضاة الشرعيين وإنت ما أطلعت عليها؟
الشاهد: جاوبت على السؤال ده قبل كدة.
((السؤال يعاد))
الشاهد: أنا مش لو وثائق.. أنا بقول ما في حق لأي إنسان إنو يمس القضاء الشرعي. لأنو البمس القضاء الشرعي يكون مس الكتاب والسنة.
