خيري أحمد خيري يناقش الشاهد

"الشاهد يؤدي القسم"
خيري: يا سيد جعفر ليك كم سنة سكرتير ثقافي لنادي الخريجين؟
الشاهد: ثلاثة أو أربعة
خيري: أديت شنو من نشاط في الفترة دي؟
الشاهد: أنا ما بقوم بنشاط لكن لما تجي محاضرة من برة ولا حاجة زي كدة بنهيئ ليها.
خيري: هل بتمشي نادي الخريجين كل يوم؟
الشاهد: كل يوم تقريباً.
خيري: هل بتمارس لعب الكتشينة؟
الشاهد: بلعب كتشينة طاولة ضمنة أي حاجة.
خيري: إنت حالف أن تقول الحق هل لعب الكتشينة من الشريعة؟
الشاهد: من اللهو البريء
خيري: بتعرف شنو عن السيد ابراهيم جاد الله؟
الشاهد: قاضي شرعي
خيري: هل بتعرف أي شئ عن سلوكو أو أخلاقو؟
الشاهد: والله ما بتتبع السلوك الشخصي لإنسان
خيري: هل سمعت في مجلس من مجالسك انو بشرب خمرة؟
الشاهد: ما سمعت
خيري: بصفتك أستاذ ثانوي عالي اشتغلت قبل كده في مدرسة بنات؟
الشاهد: كنت في شندي بنات.
خيري: ما حكم الشريعة في أنو الواحد يكون مدرس بنات؟
الشاهد: زول يؤدي خدمة في مهمة أوكلت له.
خيري: أنا بسألك عن حكم الشريعة. وانت كشاب بتدرس بنات في سن المراهقة.
الشاهد: أؤجر على العمل البقوم بيه ده
خيري: إيه رأيك في الآية ((وإذا سألتموهن متاعاً فسألوهن من وراء حجاب))؟
الشاهد: نحن ما بنسألن متاع. نحن بنديهم علم.
خيري: هل معنى كده إنو الاختلاط مباح؟
الشاهد: اختلاط وما اختلاط. اختلاط يعني شنو؟
خيري: يعني زي المحكمة دي أو زي الفصل البدرس فيهو
الشاهد: أنا ما بسميهو اختلاط لأنو أنا مدرس واحد في فصل كلو بنات.
خيري: إذا كان ده ما محرم ليه الاختلاط يكون محرم؟
الشاهد: ما تسأل ربنا: ليه حرمت ده وخليت ده؟
خيري: هل وجودك إنت وسط البنات ما إختلاط؟ هل إنت مش من جنس خلاف جنس البنات؟
الشاهد: ما اختلاط.. أنا إذا ما لقيت مدرسة أولاد حأكوس مدرسة بنات أشتغل فيها.
خيري: إذا كان في إنسان مسئول في الدين وفُرض أنو إستلف بالربا. هل بكون مخالف للشريعة؟
الشاهد: مخالف.