بكري الحاج يناقش الشاهد الأول
بكري: يا سيد جعفر، إنت قلت الاتفاق كان معاكم على عرض الكتب، وليس الملصقات. أهو ده الخطاب اللي أرسلناه لسكرتير النادي "بكري يقرأ الخطاب" هل ما فهمت من
الخطاب ده انو بتُعرض لوحات؟
الشاهد: "يأخذ الخطاب ويقرأه" هذا الخطاب لم أره من قبل.
القاضي: هل ما قريتو؟
الشاهد: لا
بكري: طيب.. إنت قلت لإبراهيم جاد الله أنو ده خروج على الاتفاق الكان بيننا وأنو دي أزمة أخلاق وإنت هسع ظهر أنك ما قريت الخطاب هل بتعتقد أنو كلامك ده فيهو دقة؟
الشاهد: أنا قلت أزمة أخلاق لأنو فيهو هجوم على القضاة الشرعيين بصورة شديدة، وطبعاً ده حصل في نادي مثل نادي الخريجين، سمعتو معروفة في البلد.
بكري: هل قولك بأنو دي أزمة في الاخلاق عشان الإخلال بالاتفاق، ولاَّ للهجوم على القضاة الشرعيين؟
الشاهد: للهجوم على القضاة الشرعيين.
بكري: هل ده كان رأيك ولاَّ رأي اللجنة؟
الشاهد: رأيي، بصفتي نائب للرئيس، وسكرتير ثقافي للنادي.
بكري: هل اللجنة اجتمعت لما جاها خطاب ابراهيم جاد الله؟
الشاهد: لم تجتمع.
بكري: هل إنت اتصلت بينا بصفتك السكرتير الثقافي وحملت لينا رأيك ده؟
الشاهد: لا
بكري: ما بتعتقد إنك في تقريرك بأنو دي أزمة أخلاق ناتج عليك من نفسك – وأنت لم تتصل بنا - ولاَّ من تأثير شيخ ابراهيم عليك؟
الشاهد: رأيي الشخصي.
بكري: إذا كان ده رأيك ليه ما اتصلت بينا؟
الشاهد: بعدما علقتوا ما بقدر أقول ليكم ده علقوه وده شيلوه.
بكري: هل تذكر أنو حصل نقاش بيني وبينك عن محكمة الردة؟
الشاهد: لا أذكر لأنو نحن إتكلمنا في حاجات كتيرة.
بكري: أذكرك أنو نحن عندما قلنا ليك أنو المحكمة الشرعية ولا أي محكمة ما ليها الحق في أن تحكم بردة أحد – إنت قلت انو المحكمة الشرعية ليها لمجرد أنها شرعية!!
الشاهد: أنا عندي رأي. حتى أنو أي ثلاثة ناس يمكن نحتكم ليهم في الأمر ده.
بكري: هل تعلم اختصاص المحاكم الشرعية؟
الشاهد: إذا كان بينا ليك أنو القانون الذي بموجبه تكونت المحاكم الشرعية لا يعطيها هذا الحق؟
القاضي: هو قال انو لا يعرف اختصاص المحاكم الشرعية.
بكري: هل دستور البلد دي بدي أي محكمة الحق في تكفير أحد؟
الشاهد: لا
بكري: هل مش من واجب المسلم أن يحكم بالشريعة كاملة؟
الشاهد: انا شخصياً مطبق الشريعة على نفسي وما لي داعي بالناس.
بكري: هل من واجبك أن تسعى لتطبيق الشريعة محكومة في المجتمع؟
الشاهد: من واجبي.
بكري: إنت في هذا الصدد ماذا فعلت كمسلم؟
الشاهد: بدرس.
بكري: بتدرس جغرافيا؟
الشاهد: بدرس جغرافيا لكن بنصح الطلبة في أي مشكلة باتباع الدين وبدعو للشريعة بقدر الإمكان.
بكري: هل بتدعو في جماعة ولا كفرد؟
الشاهد: بصفة فردية.
بكري: هل تعلم أنو عدم إقامة الشريعة منكر؟
الشاهد: لا أعتقد.
بكري: الحديث الشريف يقول: ((من رأى منكم منكراً فليغيره بيده فإن لم يستطع فبلسانه، فإن لم يستطع فبقلبه وذلك أضعف الإيمان)) هل الزول ده في أضعف الإيمان؟
الشاهد: في أضعف الإيمان.
بكري: الزول إذا كان في أضعف الإيمان. هل ده بدل على غيرتو على الشريعة؟
الشاهد: أمتنع.
بكري: إنت كشخص عادي يمكن أن يُقبل منك. لكن ما رأيك في رجل الدين الذي لم يقاوم الاستعمار لأنو في درجة أضعف من الإيمان – ألا يطعن ذلك في زعامته؟
الشاهد: إذا كان هو في أضعف الإيمان – أضعف الإيمان ده ذاتو رحمة.
بكري: إذا جاء شخص وهاجم الشخص اللي في أضعف الإيمان ده وهو بتبوأ منصب يتمتع فيه بقداسة دينية – زي قاضي القضاة – إذا جاء واحد وحدث هذا الكلام. هل هو أساء لقاضي القضاة دا وأشان سمعتو؟ ولاَّ هو أصلو سمعتو مجرحة؟
الشاهد: إذا واحد هلفوت تافه ما من حقو يهاجم لأنو إذا كان الواحد نفسو كافر، كيف يهاجم الناس هسع إذا جاء واحد من إنداية يقدر يهاجم زول تاني؟
بكري: على حسب كلامك إذا جاء واحد من الإنداية، وقال لقاضي القضاة إنت مفارق للدين بموقفك في أضعف الإيمان هل جرح سمعتو ولا قرر حقيقة ليهو الحق في تقريرها؟
الشاهد: ما ليهو الحق في ذلك.
بكري: إنت متطرق وقلت إنو طريقتكم ليس لها موقف محدد من الفكرة الجمهورية – هل ليها موقف محدد من الشريعة؟ رأيك شنو في "السفة"
الشاهد: الشيخ بتاعنا ذاتو عندو حقة وبسف
بكري: هل تعلم أنو "الصعوط" مكروه عند كافة العلماء وحرام عند الصوفية؟
الشاهد: المكروه بعاقبوا عليهو؟
القاضي: ((هو بسألك عن رأيك))
الشاهد: رأيي أنو حلال مباح.
بكري: هل طريقتكم اشتهرت باستعمال السبح بصورة مبالغ فيها؟ يعني بتستعملوها دايماً؟
الشاهد: نعم
بكري: ده كلام وارد في كتب الأستاذ محمود محمد طه ((صلوا فإنكم اليوم لا تصلون.. صلوا وابتغوا من الصلاة ما الصلاة حرية بتأديته إليكم من فيوضات البركات الناميات. ولا تقتنعوا منها بهذه المظاهر الجوفاء.. لا تهمهموا بالسبح لا في الخلوات
ولا في الطرقات ولا في المكاتب ولا في المركبات العامة فإن قدوة التقليد لم يكن يهمم بالسبح وانما كان يصلي ويفكر ويعمل))
هل هذا الكلام بيغضبك أو يستفزك؟
الشاهد: أنا أحتقر هذا الرأي..
القاضي: هل تتفق معه أم لا تتفق معه؟
بكري: "موجهاً حديثه للقاضي" هناك فرق بين عدم الاتفاق والاحتقار.
بكري: سئلت عن منشور اعتبره الحاكم العام منشور سياسي وقرئ عليك أن قاضي القضاة أشار بمنع الخلط بين السياسة والدين في المساجد. هل بتفتكر أن هذا المنع ما كان
بيشمل الأستاذ محمود؟ وما كان من حقو أن يهاجم هذا القاضي؟
الشاهد: ما من حقو.
((انتهت هذه الجلسة ورفعت على أن تنعقد في المساء في تمام السادسة ونصف))
