إن الرجل الحر حرية فردية مطلقة هو ذلك الرجل الذي يفكر كما يريد، ويقول كما يفكر، ويعمل كما يقول، على شرط واحد هو أن يكون كل عمله خيرا، وبرا، واخلاصا، وسلاما، مع الناس..
وندهت ليك مِن كُلِ أرضْ
وشلت صبر الدِنيا فُت
فتشت ليك َ حجر حجر
في كلِ وادي وكلِ صي
مرقت ليك من كل بيت
من كل شارع وكل حي
ناغمت ليك كل البلود
كل السماوات كل الطيور
حتى الصقور حتى البلوم حتى الحدي
يابا وين شالك صباح
ختاك صباح وداك وين؟
حاشاك جريات الضوين
فايتاك جفلات الجبان
علاك وين ؟
ومرقت من جرح الوطن
وجرينا للكل بالبشارة
تعالو يا ناس
جاكم خلاص
زولا سمح
زي القمح
هداك ليو
يلاك عليو
تعالو يا ناس
جاكم خلاص
جاكم خلاص من كل غم
جاكم ودار لي كل هم
كنا متباشرين عليهم
شان نجيهم
بالامان
علا عميانا البكابسو
ساقو السؤال
قالولنا وين ؟
- هداك ليهو
- هداك وين؟
الله عليكم
ما بتشوفوا؟ ؟
مِكضِبين؟ ؟
هداك ليو ما تعاينو زين؟
زولا بيان زي النخيل
الزيو ما بتغباهو عين
والزيو وين؟
جاكم خبر زيتون وتين
جاكم خبر طه الأمين
جاكم بيروى ف كل حين
جاكم بشارة العابدين
بيهو الخلاس من كل شين
داعي الفقارى المعدمين
لا ليهو اجر لا ليهو دَيْن
هداك ليو ما تعاينو زين
ساقو السؤال قالولنا وين!!
محمود كمان بغباهو زول
محمود تكنو شراع بحر
محمود تكنو بحر عديل
وين تلقى زول مصلايتو روح
وصلاتو بر الأقربين
وقرايبو كل العالمين
ما بتلقى زول خلقوهو دين
سوهو من طينة الصلاح
مزجوهو من بحر العلم
ختوهو في نُطَف الحلم
ساقوهو لي رحم الكرم
غزوهو بي نور الجليل
والسرة كانت زي ختم
خِتم الختم
سر اسرار الختم
ود سيدك السر الختم
من طه جدك جاك نور
لي طه جدك ود بدور
من سيدي وداك لي علي
ودوك لي ام الحسين
لي محمد طه وداك للفواطم
والفواطم لعبنك بالعلم
قول لي كيفن يغباهو دين
يغباهو حق
يغباهو ضل العارفين
قل لي كيفن ما يكون
ركازة الدنيا ورجاها
علا ااااح من بلادنا ومن غباها
.
.
وكان صباح وداك وين؟
وين فت وين
ندهت ليك حجر حجر
صيحت ليك يوت في المطر
يا ابويا وين؟ وين انت وين؟
انا في رجاك شيب كبر
وكم منتظر
علا الضلام غيم علي
مديت لي يد
فكيت وقع
أمسك وقع
كع كع كرع
كسرلي اييد
وكراع فلع
كع كع كرع
في الطين وقع
وسخ لي توب
نعلِ انجدع
أمسك وقع
أمسك وقع
كم من ركام
كم من وهم
كمين اباطيل
قلة فهم
قلة ادب
قلة علم
سايمة في حق الله ترعى
كما البهم
تمسك هنا وتقبض هناك
تبسط شويي
أقول فِهِم
علا اطلع زي دفيس
اقله سيل يصبح عدم
قلة علم
قلة أدب
قلة فهم
أديني ضو
شان اشوف المرقة كيف
ضمد لي ايد
واديني سيف
مو سيف حرب
سيف للفكر
ابسط لي نور يمحى الاباطيل والوهم
امسكني يوت
لا تنسى برضو معاي اهل
علا باكر
لما ترجع
بحكي ليك كل الحصل
القلتو كلو طلع حقيقة
طوفان كبير غطى الأرض
كل زول شاف ليو درب
في ليل حزين قلبوا الوضع
قالوا الحمل يرعى الضبع
قالولنا انتو بلا فهم
لا دين تعرفوا ولا كفر
الليلة حصة دين كبيرة عشان تعرفوا منو العدو
الله قال شيلو الزكاه
قالت سماح:
وين الصلاه
وين الشهادة قبل كده..
ضحك الشويخ
قال ليها وين ربط الرويس
ليه الكحل إت ماشه وين
ليه الوشيش مليان كريم
حتى ال….
أستغفر الله العظيم..
ودوها يا ناس لي صلاح
اديها درس الاحتشام
ودوها يا ابوي لي صلاح
ولي الليلة ما ظهرت سماح ..
ساقوها ناس الارتكاز
ودوها للزول في الجهاز
والشيخ اكمل حصتو
اصلوا الزكا: فرض عديل
زي الجهاد
والامر بالمعروف كمان
زي القتال
زي الحرب
زي الدواس
(الله أكبر) هِي هِي هِي
بس يا شويخ حالك
الشايفنو داك
مو حال جهاد
يدك مرخرخه حبتين
صوتك ملخلخ زي فطين
علاها بت زولا نجيض
ترعى الغنم والحر يرصع في الجبين
جسمك يلالي زي التقول
(أستغفر الله العظيم)
بتحرض الناس التعابة يحاربو ليك عشان تنوم!!
والله عال
والله عين
كان شفت يابا بقول كلام
(عن الصيام، فقه الضرورة والاحتشام، الراشدين لا سيما الخطاب كمان)
وابكيلك الزول العبيط ويزيد لك الطين حبتين
زي التقول ابو حفصة مات ليو جمعتين
واحكي لي ناسا تعابة
عن الصحابة ..
والتابعين ..
والزهد والنوم والقوى
طاوينو ديما بلا كتابه
ولا يمين .
وهو في المنشية ساكن
راكب التكييف ومااااكن
شارب الموية البتحرق
وناس بتشربها من حروقها
,
,
عشة كرهت لي حياتها
شحدت الله بعد صلاتها
لو كان ده دينك
ماني بتوجه عليك
احمد وحيدي فيوم مرق
ماشي للسوق اشتري
جايبلي بس عيشتين جري
قالولو عمرك كم سنة
قال حداشر
نهرو ضابطا بي شراتي
قالو كضاب جنس واطي
نهزلوه وبهدلوه
ولي جهادهم سفروهو
لو كان ده دينك
ماني بتوجه عليك
هو دينك دين سلام
ما شفنا "العبيد" رسلو زولا
للزحام
"ود ريا" قال:
دينك السمح العديل
تجبر الخاطر تشيل
من زول كبير
او كان صغير
حملا على ضهروا اتكأ
ما قال جهاد كفار بدا
كذا "المكاشفي عبد الباقي" قال
لقيمة الجايع اخير
من سَقِف كعبة وعريش
ومن جهاد كفار قريش
هودينك بدلو؟؟
عشة كرهت لي حياتها
شحدت الله بعد صلاتها
لو كنت في ..
بدور لي شوفتا في الشقي ..
صبح الصباح دور حكي
قالوا الحكومة حتنقلب
قال المذيع ده كلام كضب
وين تنقلب!!
بس الشويخ (ود الكلب)..
عشوشة ردت بي عجب
الشويخ؟ (ود الكلب)؟ ..
ده شنو البيحصل في البلد
قال المذيع
ده زول كلب..
خان البلد قصد اللعب
طردوهو اهلوا بلا ندم
قالت عشوشة بلا فهم:
حيرانو تقصد
قال المذيع :
بس انتهى.
امنت بيك بلا اعتراض
امنت بيك سايق الظلم لي كيد متين
امنا بيك وموحدين
عشوشة ادت ركعتين
قالت لي: هوي، متين بجي
قت ليها قرب بس اصبري
عشوشة ماتت بين ايديا
تندهك قبل الولاد
شاحداك ترجع للبلاد
سألاك لمتين غربتين؟
بس تعال
والله احكيلك حكي
اشكي ليكَ عشان تحنن غربتي
وفيك اتكي
يا ريت تجي
ياريت تجي.
ابويا يا وش السماحه
ابويا يا الضل الرخي
كان للرجاله مكملة
عاجبني وقت المهزلة
واقف غريب زي الكفن
قالولو قول اي اعتزار
ضحك ابتسم
قال يا بجم
انا كان بسوي الاعتزار كان انعلم؟ ؟ ؟
ما كنت زي ناسا كتار سويتلي مال
سويت بهم
انا كان بسوي الاعتزار كان انعلم؟ ؟ ؟
عا جبني وقت المقدرة
لمن مرقت على الخلق
زولا بشيل الحق بره
وقفت لا ضل لا ضره
هوي يا عباد
شن القعاد فوق البلاد المقبره
شن فايدت الروح البتطلع
لم تتهان المره
شن فايدت النفس البتاوق
لو البلاد في يوم تباح
وايش فايدت العمر البساسق
وليلو ينتظر الصباح؟
عاجبني وقت المقدرة
كل العباد مرقت معاك
كل الخلوق كل الشجر حتى البحر فاض واندفق
حتى السحاب حتى الحجر
كل الخلوق سمعت كلامك في العشيي وفي الضحى
اب كريق نادى السمك
والحدي نادى الطيور
النمتي واب درق
النيل طمر لاقى البحر
حتى الحراز نفض الورق
الليلة حي على الفلاح
الليلة خاتي الما مرق ..
كل الخلوق
كل البلاد
بيناتها بين الظلم شط
خاته ايدها على الجمر
والعين تعاين في الغلط
عاجبني وقت المقدرة
سمح التقول زولا بره
النيل طمح دفق الخله
وانت قدام الخلوق
كل الخلوق انت الخلوق
كل البلاد انت البلاد
زولا دوام داحر الفتن
زولا تكنو براو وطن
والنيل طمح دفق الخله
كل الخلوق جات البحر
الليل كفر
غطى البلاد عم الارض
علا نيلك باقي نور
بس التقول داك السما
كل النجوم بهناك تلالي
وانت في الوسط البدر ..
الليلة حي على الفلاح
الليلة حي على الكفاح
الليلة خاتي الما مرق
انا كان بسوي الاعتزار
أكان ختيت سجن الخواجة الما هزار.
عاجبني وقت المهزلة
سقت الكلام للزول عديل
ورميتلو عين:
انت يا قاضي الظلم
مابتراعي القبلتين ..
الزول انبهم
هنبول واقف ضلفتين
قال ليك احسن تعتذر
ولا يازول تنقتل
هنبول واقف ضلفتين ..
مين بنقتل؟
مين البيخشى من القتل
والله ياخالي الفهم
كان عاينت فيهو اكان فهم
هو زولا موشح بالكفن
بخوفوهو من القتل؟
زولا لباسو الحق دوام
فوق راسو عمة منتقم
سروالو حالة الاصطلام
وجبينو ابدا ما نهزم
مركوبو بمشي على السلام
علا خاتيهو الجبن ..
وكان صباح
كان الحكم
قالوا زنديق قالوا كافر
والله كان شوفتو المهازل
قبلك الكرار علي ..
قالوا زنديق قالوا فاسق
والله كان شوفتو المهازل ..
علا وجعك ما بعيد
داك الحسين يندهلو عيد
مرق الحسين
ارجع تعال
ضحك الحسين من الِلِقال
وين الرجوع من السفر
كيف الهروب من القدر
مرق الحسين قبلك هنا
عاين وقال كافي العدا
كان مت يوم متوشح السيف والدرق
شان يمرق الزول السمح
من صلبي ينضح بالعرق
نظر الحسين
في الغيب هناك
شافك تلالي متل هلال
طلبك عديل من ذي الجلال
قال ليهو مهرك (تنكتل)
نظر الحسين
قال مهر دون
الروح عشان خاطرك تهون
طلبوك طلب ..
ندهوك من جد الحسن
مرقوك من صلب الحسن
ختوك في صلب الحسين
وداك للسجاد علي
وداك للباقر عديل
للصادق الخير الولي
من كل شريف لي كل شريف
لا مالكي لا حنبلي
اصلو علم البيت براو
لا اجتهاد لا مفتري
وجيتنا جاي
عرفوك ناس من غير حقيقتك تنكشف
نكروك ناس زي الشمس ما بتنعرف
في داك صباح
كل زول قال معترف
انت الرجاله معاك اسم
انت الشجاعة معاك رسم
في زول يقابل موتو بي وش مبتسم ؟!
وضحكت زييين
فاكرنو موت
كيفن بموت زولا بعيش في كل زول ..
زي القلب
سكنو العيون خاتنو في حدق اللواحظ زي كحل
نمسابو من تغرب علينا
نصحابو من تشرق فجر
كيفن بموت نور الشمس
كيفن بموت ضو القمر !!
يا (أسما) جيبي قلم ابوي
وتعالي قعدي معاك (هدى)
ابدي اكتبي من جديد
هو الكتاب يادووووووب
بدا
