سائل: في رأيي أنا المحاضرة بتاعة الأستاذ محمود كانت رايعة جداً، والواحد يعني قضى لحظات سعيدة، وكان بستمع جد لي عالم، في رأيي أنا، عالم في بلدنا هنا، إذا كان الواحد وقفت قدامو أي حاجة في أمور الدين بتاعتو، في رأيي ما مفروض يرجع لي أي زول غير للأستاذ محمود، وبالرغم إنه أنا ما بنتمي سياسياً للحزب بتاعه هنا. وأنا في رأيي السؤال الفات دييا كان تهريج.. ودا عايز يحرف الناس عن القضية بتاعتم، أو عن المحاضرة الناس جو إسمعو ليها، ومفروض يتناقشوا فيها يعني. وأنا عندي سؤال بسيط، بفتكر أنو، بالرغم من الكلام الكتير القالو الأستاذ محمود عن الحقوق الأساسية المفروض تتوفر في الدستور، في رأيي أنه في حاجة ما واضحة، أو الأستاذ محمود يحتمل يكون قالها، أو بالنسبة لي أنا ما واضحة. الجو العام السياسي الموجود عندنا في البلد هنا، من سنة خمسة وستين وجاي، في جو بتاع تهريج و تضليل وإفساد للمعاني الإسلامية، وفي ناس بحاولوا، زي ما قال الأستاذ محمود، يحتمل يكون زي هم قال عن جهل، لكن في رأيي أنا ما عن جهل، الناس ديل البحاولوا يهرجوا ويضللوا باسم الدين، في رأيي أنا ديل ناس واعيين وعارفين هم بعملوا في شنو.. لكن الحاجات دي بعملوها لي مصالح سياسية، ولي حاجات، لي أغراض شخصية برضو. الأستاذ محمود رفض المسودة أو في رأيه أنه المسودة بتاعة الدستور ال بيطلقوا عليها أنها مسودة دستور إسلامية الوضعتها اللجنة القومية بتاعة الدستور، رفضها باعتبار أنها هي ما فيها روح الإسلام وهي ما إسلامية.. وأنا بتفق معاه في دي.. برضو الأستاذ محمود اعترض أو قدم بعض الاعتراضات لموضوع الدستور العلماني وورى العيوب بتاعاتو.. لكن في حاجة الأستاذ محمود في رأيي ما وضحها أنه في الفترة الهسع نحن فيها أو في الظروف السياسية المعاشة يعني في البلد بتاعتنا في لجنة بتاعة دستور موجودة بتضع في دستور، حا تطلع حتما بدستور كان نحن موافقين أو ما موافقين يعني.. إذا كان هذا الدستور أطلق عليه إسلامي أو غيره البلد حا تحكم بدستور بعد مدة معينة، سنة أو سنتين أو أي حاجة.. حا يحكم .... (كويس جدا حأختصر.) حا يفرض الدستور دا علينا.. من هسع يعني لحد ما يفرض الدستور دي انا عاوز الأستاذ محمود يوريني أنه الأسلوب الممكن الناس يتجمعوا به كلهم، الناس المعارضين للدستور دا يعني عشان يفرضوا دستور جديد، أو على الأقل يعطلوا الدستور الموجود دي.. الناس يعملوا شنو يعني؟ أنا في رأيي انه الندوات الصغيرة اللي زي دي ما حا تعطل الدستور دي الدستور حا يتوضع فالحل شنو يعني؟ عشان نحن إذا اتوضع الدستور دي الندوة بتاعة الأستاذ محمود اللي زي دي تاني ما حا نسمعها يعني، ويحتمل الأستاذ محمود ذاته نفقده يعني..