الكتاب السادس من سلسلة:
وقائع قضية بورتسودان

بدرالدين يوسف يناقش الشاهد

بدرالدين: يا شيخ محمد الحسن إنت إمام جامع مسعود.. هل قاعد تهاجم الأستاذ محمود في مسجدك؟
الشاهد: بنهاجمو كتير لأنو في اعتقادي مرتد وكافر.
بدرالدين: يوم الجمعة 26/4/1974 ده اليوم اللي اتفتح فيهو البلاغ. هل تذكر إنك خطبت ضد الجمهوريين في اليوم داك؟
الشاهد: أنا ما بذكر في المعرض ولاَّ غيرو.
بدرالدين: يا شيخ محمد الحسن أنا بذكرك – هل إنت ما بتذكر في يوم الجمعة داك إنك قلت: في نفر من العلماء والناس الأفاضل إتصلوا بيك ونوهوا ليك تهاجم معرض الجمهوريين؟
الشاهد: أنا ما قلت هذا الكلام.
بدرالدين: يا شيخ محمد الحسن هل تذكر سنة 73 أنا جيت اتحدث في مسجدك. وانت منعتني الحديث؟
الشاهد: أتذكر.
بدرالدين: قلت بتهاجم الأستاذ محمود في خطب كتيرة ما بتذكر عباراتك البتهاجم بيها الأستاذ محمود؟
الشاهد: أنا قلت أنو محمود بقول انو الواحد لما يصل درجة معينة من العبادة تسقط عنو العبادة تسقط عنو الصلاة، صلاة التقليد وتبقى ليهو صلاة براه غير صلاة التقليد وانو بقول إن ابليس ما خالد في النار.
بدرالدين: كنت بتصف الأستاذ بشنو؟ وبطالب المسئولين بشنو؟
الشاهد: بطالب بأن يوقف نشاطه. وبقول أنو مرتد حكمو القتل.
بدرالدين: هل قريت كتب الأستاذ محمود؟
الشاهد: قريت حوالي تسعة أو عشرة كتب.
بدرالدين: هل تعلم أنو الشريعة الاسلامية نظمت أحكام خاصة للرق؟
الشاهد: أيوه.
بدرالدين: الاحكام الخاصة بالرق بيفتي إنسان مسلم ولاَّ غير مسلم؟
الشاهد: المسلم طبعاً. غير المسلم ح يفتي فيها كيف؟
بدرالدين: إذا في إنسان مسلم ويدعي أنو شرعي وطلب أنو غير المسلم يفتي ليهو في موضوع الرق. رأيك في الزول ده شنو؟
الشاهد: يكون مسلم عاصي.
بدرالدين: المسلم العاصي رجل محترم أم غير محترم؟
الشاهد: أقل مرتبة من الملتزمين.
بدرالدين: وإذا إدعى أنو مسلم كامل الاسلام هل ممكن أنا أصفو بأنو ضعيف الدين؟
الشاهد: لا.. لا يوصف بالضعف.
بدرالدين: يا شيخ محمد الحسن ده منشور من قاضي القضاة أثناء الحكم الانجليزي. صدر المنشور في 25/4/1936 منشور رقم 46 يقول: بموافقة جناب السكرتير القضائي نمرة (5) لا تسمع المحاكم دعوى من شخص يطلب بها الإرث لمتوفي بطريق الملكية وانما المختص بنظر هذه الدعوى هو المدير، نمرة (7) إذا حصل نزاع بين الخصوم في الرق تخول المحكمة الشرعية أمر الفصل فيه للمختص بنظره وهو المفتش وبعد فصله فيه يسير في الموضوع المعروض عليها طبقاً للنصوص الشرعية التي يقتضيها قراره، أصدر المنشور قاضي القضاة محمد نعمان الجارم.
وده منشور تاني: تعليمات للمحاكم الشرعية نمرة (34)
صدرت من محكمة عموم السودان الشرعية بعد موافقة جناب السكرتير القضائي لحكومة السودان في 14 ذي الحجة 1355 ﻫ الموافق 25 فبراير 1937 (تنص الفقرة الخامسة من المنشور الشرعي نمرة (46) على منع المحاكم الشرعية من سماع الدعوى من شخص يطلب الإرث في المتوفي بطريقة الملكية وأن يحال الأمر في مثل هذه الدعوى على المدير لاختصاصه بذلك. وكان العمل جارياً بناء على المنشور نمرة (7) الذي ألغي بذلك المنشور
على أن تسلم الشركة في حالة كهذه لدى الاسترقاق دون إعلان ولكن قد رؤي مؤخراً أن ذلك لا ينطبق على قانون تسوية الأراضي وتسجيلها بالنسبة لنقل ملكية العقار لذلك يجب أن تلاحظ المحكمة متى وصل إليها القرار من مدير يقضي بتسليم التركة طبق المادة (226) من لائحة الترتيب والنظام. وتضمن الاعلان أو القرار أمر المدير – ليكون الأساس فيما اشتمل عليه من تسليم التركة إلى الطالب بطريق الاسترقاق لا بطريق الارث فعلى المحاكم الشرعية العمل بهذا من تاريخ نشره
قاضي قضاة السودان
محمد نعمان جارم
المصدر: كتيب نشرات وتعليمات المحاكم الشرعية.
بدرالدين: هل ما بيفهم من المنشورين أنو المحاكم الشرعية في اختصاصها كالرق والإرث بتجعل غير المسلم كالمدير الإنجليزي يفتي ليها فيه؟
الشاهد: ((يطلب أن يقرأه فيعطى له)) ده كلا كان أيام الاستعمار الناس كانوا مقهورين
بدرالدين: هل المقهور عزيز أم ذليل
الشاهد: إذا كان بيحكم الاستعمار. ما ذليل.
بدرالدين: عزيز؟
الشاهد: ما عزيز
بدرالدين: البستجيب لرغبة الحاكم القاهرو هل ما ذليل؟
الشاهد: ربما ما استجاب للقهر.
بدرالدين: هم استجابوا للقهر!
الشاهد: ((صمت))
بدرالدين: هل تعلم أنو قاضي القضاة أصدر منشور يمنع الحديث في السياسة في المساجد؟
الشاهد: لا أذكر.
بدرالدين: إذا حصل هل ده عمل مع الحركة الوطنية ولاَّ ضدها؟
الشاهد: هذه الأشياء بتملى على الشعب من المستعمر وما عندهم أي سلطة؟
القاضي: ((يعيد السؤال))
الشاهد: ضد الحركة الوطنية – وإذا حصل منو يكون خطأ.
بدرالدين: إذا فرضنا جدلاً أنو قاضي القضاة أو أي إنسان بعمل ضد الحركة الوطنية هل ما من حقي أصف موقفو بالرداءة؟
الشاهد: ما من حقك.
((الشاهد يسحب هذه الإجابة))
الشاهد: يجوز القاضي المنع يعرف أنو في ذلك مضرة للشعب في الوقت داك – لذلك نصحهم لكي لا يتعبوا.
بدرالدين: يا مولانا إنت إجابتك سحبتها لأنها كانت غير حق؟
الشاهد: لأني تسرعت وما فهمت السؤال كويس.
بدرالدين: يا شيخ محمد الحسن – إنت إمام مسجد. وبتعرف تاريخ الاسلام. هل النبي صلى الله عليه وسلم كان عندو زي خاص؟
الشاهد: ما كان عندو زي خاص.
بدرالدين: هل القضاة الشرعيين عندهم زي خاص مكتسب من قداسة دينية؟
الشاهد: ما عندهم زي خاص.